ന്യൂഡൽഹി: മാസപ്പടി കേസിൽ മുൻ മുഖ്യമന്ത്രി പിണറായി വിജയൻ, മകൾ ടി. വീണ, മുൻമന്ത്രി മുഹമ്മദ് റിയാസ് എന്നിവർ സമർപ്പിച്ച അപ്പീലുകൾ സുപ്രീം കോടതിയുടെ അവധിക്കാല പ്രത്യേക ബെഞ്ച് നാളെ പരിഗണിക്കും. ദസറ അവധിയാണെങ്കിലും കേസിന്റെ അടിയന്തര സ്വഭാവം മുൻനിർത്തി ജസ്റ്റിസുമാരായ ജോയ്‌മല്യ ബാഗ്ചി, വി. മോഹന എന്നിവരടങ്ങിയ ബെഞ്ചാണ് ഹർജികൾ ലിസ്റ്റ് ചെയ്തിരിക്കുന്നത്. മൂവർക്കുമെതിരെ വിജിലൻസ് കേസെടുക്കാൻ കേരള ഹൈക്കോടതി സിംഗിൾ ബെഞ്ച് നൽകിയ ഉത്തരവും ഡിവിഷൻ ബെഞ്ച് അത് ശരിവച്ചതുമാണ് പ്രതികളെ സുപ്രീംകോടതിയെ സമീപിക്കാൻ പ്രേരിപ്പിച്ചത്.
ഈ കേസിൽ അറസ്റ്റിൽ നിന്ന് സംരക്ഷണം ലഭിക്കുമോയെന്നതാണ് ഏറ്റവും നിർണായകമായ വിഷയം. ചോദ്യംചെയ്യലിനായി ഈ മാസം 23ന് ഹാജരാകാൻ ഇ.ഡി ആവശ്യപ്പെട്ടിട്ടുള്ള സാഹചര്യത്തിൽ, അറസ്റ്റ് സാധ്യതയുണ്ടെന്നും 82കാരനായ പിണറായി കസ്റ്റഡിയിലാകാൻ ഇടയുണ്ടെന്നും അദ്ദേഹത്തിന്റെ അഭിഭാഷകൻ സിദ്ധാർത്ഥ് ലൂത്ര കഴിഞ്ഞദിവസം ചീഫ് ജസ്റ്റിസ് സൂര്യകാന്തിന്റെ ശ്രദ്ധയിൽപ്പെടുത്തിയിരുന്നു. പ്രതികളുടെ ഭാഗം കേൾക്കാതെയാണ് ഹൈക്കോടതി ഉത്തരവിട്ടതെന്നും കേരള പൊലീസിന് ഇ.ഡി കൈമാറിയ വിവരങ്ങൾ കേസെടുക്കാൻ പര്യാപ്തമല്ലെന്നും അപ്പീലുകളിൽ വ്യക്തമാക്കുന്നുണ്ട്. ഈ വാദങ്ങൾ പരിഗണിച്ചാണ് ചീഫ് ജസ്റ്റിസ് അടിയന്തരമായി പ്രത്യേക ബെഞ്ച് രൂപീകരിച്ചത്.
